八八論壇 Forum88

htys4b04 · 管理員 註冊時間: 2006-04-16 文章: 3073

四年的各式各樣減肥經歷(很詳細)

我見好多討論區d女仔都話想減肥問有咩方法. 其實真正work的方法係人人都知道的. 咪係做運動同食少d肥膩野. 只不過唔係人人都可以做到. 我都係其中一個例子. 我由細到大都係肥的. 用係身上關於減肥的起碼用左十幾萬左右. 我今年24歲. 由20歲開始減肥了. 以下係我所有的減肥方法同經歷. 大家可以參考一下.

1) 20歲o個時d纖體公司無而家咁多. 我去左唐安琪到減肥. total用左差不多兩萬幾三萬. 佢要求一星期去做兩次機. 同埋食野都要按佢的指示. 早餐只可以食低脂乳酪一杯. 而午餐同晚餐就唔可以肉同飯一齊食. 如果o個餐你選擇食肉同菜的話. 仲要70%係菜30%係肉. 我心諗我咁食法唔使搵你幫我減我自己都減到啦! 不過我都有間中偷食. 還有做機時d姐姐係咁叫你join多d plan同買d野番去搽真係好煩. 過左兩個月剩係減左幾磅寸數減左少少. 但我本人唔覺得自己瘦左囉!

2) 之後我開始食減肥藥. 我食過一d控制胃口的. 真係有效. 因為你都已經無胃口食野了. 有而家好出名的諾美婷/曲美/康婷. 跟住塊面狂生暗瘡. 可能身體的荷爾蒙亂左. 之後停左藥睇中醫同做facial先好番灑. 又用左我好多錢. 再食一隻中醫(唔記得咩名) 柯到我死死下. 又買fancl的slim up同埋佢出個熱控同蟹殼素都唔得. 仲有好多好多...........當中都唔記得用左我幾多錢了.

3) 22歲時經朋友介紹去左變靚d減肥. 佢幫我set左個plan total二萬幾. 有四次見營養師. 八次中醫八次西醫同一次見心理師同埋做機. 第一次見西醫係要食藥的. 佢開左控制胃口的藥/新陳代謝丸同排油丸. 第一次係排油丸嚇死我. 一食d肥膩野時即係要去廁所排油呀! 個肚仲好痛架! 我覺得好核突又嘔心. 柯出來的油好臭的. 就係因為我覺得核突我唔敢食肥膩野. 加上食左藥無乜胃口. 其實食西藥真係好多副作用的. 佢的原理就係要睇埋中醫去調理番西醫的effect. 例如失眠..... o個時我自己有做gym的. 一個星期三晚去跳健康跳同理下跑步機. 咁就由112磅減到100磅. 真係好開心架! 因為身邊d人個個都話減左喎! 兩個月其間我都無做減肥機的. 因為佢地話要落到一定磅數先可以做. 我目標係94磅. 但到了100磅之後就停左. 加上八次中醫西醫都已經結束了. d藥一停我就肥番少少. 之後我再比多二萬左右join好多次通淋巴同G5 D機. 諗住一星期去兩三次都可以keep到收番靚個身形. 點知我又好少去做. 之後開始食番好多野同停埋做gym. 又肥番到110磅了. 即係之前d心機全部係白廢的. 仲浪費埋d金錢.

3) 到我23歲比人呃左去左d直銷公司. 佢話佢地係幫人減肥的. 但要買佢地d健康食品同有專人跟進你. 比我睇埋減肥時可以食d咩! 我覺得好吸引喎! 減肥仲可以食咁多野. 又無問清楚. 之後心軟又比左三萬幾了(仲係借財務公司比的) 原來佢地係用食肉減肥法呀! 眼見o個度有d人真係成功減肥. 但我一向唔多鐘意食肉的. 我情願正係食飯同麵包. 但佢地連菜同生果都唔食得. 要食佢d健康食品來補充番當中蔬果的營養. 咁我咪午餐帶d肉之類的返公司食. 但成日又偷食麵包. 咁即係減肥變左增肥呀! 仲肥過未減o個時. 之後我無再去o個間公司了. 因為d人太假. 表面好似有你好好咁. 但其實想你帶d fd上去開分. 咁佢地從中咪可以有佣分囉! o個時我一心係減肥都唔諗住做傳銷的工作. 所以我無再搵佢地了.

4) 今年24歲年頭時去睇減肥醫生. 佢都係開d控制胃口的藥比我. 初初係真係減到. 但慢慢可能身體適應左e隻藥之後開始無效了. 但o個時食藥食到我面青青. 個身體好差. 之後可能我又唔夠時間休息. 成日食完野又嘔番出來. 頂唔順去睇西醫. 醫生幫我檢血話我嚴重貧血. 之後我仲入左醫院輸左兩包血先無事.

5) 跟住前兩個月又比左三萬幾去左一間美容院join左d減肥機同打十次減肥槍. 減肥槍係香港未普及. 但之後係有雜誌報導過的. 平均打一支針要$3800. 我join左打十支所以$28000 雜誌話o係肥胖的地方打一支針. 一次都已經見到少少效果. 如果真係想好好效果就一個地方打五支. 但每次只可以打一支. 要分開來打. 同埋係要醫生打的. 我而家仲未做呀! 因為d美容師叫我做多d機先. 等d脂肪無咁厚先打針會無咁痛的. 因為始終我都驚驚地. 等遲d做完再同大家講啦!

我而家都係112磅. 我真係好想瘦好想瘦. 但又無恒心. 成日諗住食埋今日先啦! 我仲懷疑自己有暴食症呀! 明明夜晚一d都唔肚餓但就不停咁食. 一食就唔停口了. 食完之後會好後悔. 維護左一個月左右而家好d了. 所以現在真係要的起心干. 我報左工聯會的跳舞班. 10月尾開始. 同埋而家開始要努力食得清淡d. 希望能去番100磅.

總括來說. 我減過咁多次肥. 要真係有效的真係做運動同食. 食真係好影響一個人的體型. 減肥其實唔難. keep先係最難o架! 唔會再浪費金錢去d減肥公司減肥. 佢地唔係正係做機咁簡單. 一樣要你做運動同節食. 咁o既方法自己減都得啦! 只不過係恒心. 恒心真係好重要o架! 我唔想大家好似我咁浪費咁多金錢. 同埋出面好多纖體公司同減肥藥都話唔會番肥. 其實係假啦! 如果停左之後自己唔keep暴飲暴食咪一樣係肥.
_________________
i love Ka! Yan

帝國 · 發表於: 星期二十月 03, 2006 8:26 am 文章主題:

Thanks for sharing.
_________________
微笑----生命的活泉.享受人生,享受每一個由心的微笑

在生命中不管遇到任何困難，都不要失去臉上的笑容。